حوار العمالقة : بين الشاعر أحمد البرغوثي ووالده حمد بن سالم البرغوثي

حوار العمالقة : بين الشاعر أحمد البرغوثي ووالده حمد بن سالم البرغوثي الذي يشكو تصاريف الزمن الرديء، على إثر مروره بمرحلة عصيبة من حياته.

يقول حمد بن سالم البرغوثي لابنه:
-------------------------------------

عدّيت عمري بزهو الخلاعة ** يجوني بطاعة ** ولا شربت عمري سرد النشاعة

***

عدِّيت عمري فايام بكري ** بميزان فكري ** و من غص شارق يجيني لوكري

نشّرك ونرقّع بحرير عكري ** واته الرقاعة ** و اليوم عدنا غزايل بضاعة

***

اليوم عدنا غزايل وعيفة ** خليقة شفيفة ** وكل حد صايل علينا بسيفه

منين كان وقتي طبله نزيفه ** يرعب صداعة ** تحلق وتفرق عليا الجماعة

***

عدّيت عمري منين كنت غالي ** شادت افعالي ** عيشة نقاتي قمح الدوالي

واليوم سيدك ملوح لتالي ** نفوه الجماعة ** صلاة النبي ردُّوها نزاعة

***

عدّيت عمري مع كل قايد ** ليّا شوايد ** نصلّح و نرقّع في كل بايد

اليوم عدنا صرد الصرايد ** في ملح قاعة ** يا عقاب عمري وين المناعة

***

قدّام أهل الجمايل يجوني ** شادوا فنوني ** مطاليب ندفع عليهم عيوني

واليوم هاني لابس ثموني ** طلبت الشفاعه ** غلينا رخصنا على دور ساعة

يجيبه ابنه أحمد البرغوثي :
---------------------------

يا سيد اصبر على داك دسّه ** بالك تمسّه ** و أيّاك مضرب محير تمسّه

بالك ينشف غديرك و تنسى ** نهار العجايب ** يوم المكاره علينا حزايب

***

يا سيد اصبر على ضيم حالك ** نوصّيك بالك ** تحاذي المسانيح يغبر سوالك

و لا عشت لازم تروّح رجالك ** توفى الشغايب ** و تنسى وجايع سنين الجدايب

***
يا سيد اصبر وطاوق الشدة ** راهي تتعدّى ** ليام تنقال رده برده

أحسن بنادم لا كان عندَه ** يدير الصوايب ** و حتّى المكاره توللي حبايب

***

يا سيد اصبر وعدّي الغباين ** المقدور كاين ** عمرك تعدّى مع الغير هاين

اليوم لاسماك وسع الخباين ** يدل الذهايب ** يتبّع تصاريف وقت الغرايب

***

يا سيد هالوقت ماهوش باهي ** ناسه دواهي ** و ما عدت توجد عل العين ماهي

نوصيك كانك اتدوّر وشاهي ** تخطى المصايب ** بأفلاك بين الحفي و الرطايب

تراثنا